ЗАКОНСКО РЕГУЛИРАЊЕ НА УЧЕСТВОТО НА УЧЕНИЦИТЕ ВО СРЕДНИТЕ УЧИЛИШТА ТВ 24 ВЕСТИ 17/03/2016
Коалицијата на младински организации СЕГА заедно со Младински Образовен Форум (МОФ) и Првата Детска амбасада во светот МЕЃАШИ започнаа Иницијатива за измени и дополнувања на Закон за средно образование. Целта на иницијативата е да се вметнат нови одредби во законот со кои ќе се обезбеди регулирање на учеството и организирањето на учениците во средните училишта во Република Македонија. Целиот предлог произлегува од утврдената потреба за законско регулирање на материјата која се однесува на ученичкото учество во образовниот систем за да се гарантира правото за здружување и учество на ученикот, да се придонесе кон подобрен квалитет на живот на средношколците и развивање на нивните демократски капацитети и активно граѓанство. Во процесот на изработка на документот влегоа конкретните препораки кои произлегоа од локалните дискусии спроведени од Коалицијата на младински организации СЕГА, Првата детска амбасада во светот МЕЃАШИ и Младинскиот образовен форум.
Зоран Илиески- Коалиција СЕГА: „Во Македонија отсуствува политика за ученичко учество која би вклучила различни форми на учество и здружување со цел придонес на оваа група на граѓани пред се во ученичкиот но и во општествениот живот. Го повикуваме Министерството за образование и наука да ја поддржи оваа иницијатива и да отвори процес со вклучување на сите засегнати страни со цел да имаме добро законско решение„
Драги Змијанац - Прва детска амбасада во светот Меѓаши: „Детското учество, детскиот активизам и правото на детско мислење се фундаментални права на децата. Тие им овозможуваат со практикување активност и активизам да ги остварат нивните права, детските права. Учениците да можат слободно без притисок да го искажат својот став поврзан со прашања кои ги засегаат директно нив е од суштинско значење. Токму затоа Првата детска амбасада во светот Меѓаши се вклучи во заедничката Инцијатива за законското уредување на ученичкото учество во Законот за средно образование.“
Дона Костуранова - Младински образовен форум: „Една од улогите на образованието е да гради активни граѓани во едно општество. Само преку однос кон учениците кои поттикнува самоизразување, организирање и доверба во нивните капацитети да ги препознаат и да се застапуваат за значајните прашања може да имаме образование кое е ориентирано кон ученикот. Охрабрувањето на учеството и давањето важност на мислењата на средношколците за прашањата кои ги засегаат е чекор кон нивно оспособување за демократско учество и градење доверба и соработка во системот.“
