Првата детска амбасада во светот Меѓаши не се согласува со одлуката на Уставниот суд во однос на донесените измени во Законот за помилување. Директорот и соосновачот на амбасадата Драги Змијанац за ТВ Орбис истакна дека во нивните 24 годишни напори за заштита на детските права и поголема превенција од сексуалната злоупотреба на децата, со огорченост и револт ги осудуваат одлуките на Уставниот суд, претседателот на државата да може да помилува педофили.
„Сметаме дека ова е срамна и скандалозна одлука и воопшто не помага во превенција и заштита на децата од сексуалната злоупотреба, која е една од најтешките трауми која што може да му се случи на едно дете“ рече директорот на „Меѓаши“, Драги Змијанац.
Од овие причини, во текот на вчерашниот ден „Меѓаши“ упати повик до граѓаните, граѓанските организации, родители или било кои индивидуалци кои им мислат добро на децата да им дадат поддршка за да се обратат до Уставниот суд околу последната одлука.
„Да го изразиме јавно нашиот револт и да бараме во Собранието да може да се раздвојат овие одлуки“, истакна Змијанац.
Во меѓувреме, денес се огласи претседателот на РМ Ѓорѓе Иванов, по последната одлука на Уставниот суд поврзана со Законот за помилување.
„Би сакал да им порачам на граѓаните на Република Македонија да бидат спокојни. Ни на крај памет не ми паднало и не ми паѓа да помилувам педофили, нарко-дилери, силеџии на избори, терористи, екстремисти. Како и досега, ќе го правам исклучиво она што е исправно и е во интерес на државата“, изјави претседателот Иванов.
Во Регистарот за лица осудени за кривични дела за сексуална злоупотреба на малолетни лица и педофилија, од Битола се наоѓаат 10 лица.
